مفيش حد يقدر يختار الظروف اللي هو هيعيش فيها 8

حسن واقف مع صفيه بالغرفه اللي فيها التبريد !

سكت لحظه يفكر

_ احنا مش هنقتلها زي ما انتي فاهمه.

صفيه باستغراب

_ يعني ايه يا عم حسن دي فزوره

_ مش فزوره ولا حاجه اسمعيني. احنا هنخطط وندبرها مصيبه ونقول لمنصور بيه وبعدها انتي عارفه الباشا هيعمل

_ اهااا فهمتك يا عم حسن وبكدا منصور بيه يخلص عليها ويبقي خلصت منها وارتحت انت .

_ اسمها خلصنا منها وارتحنا ركزي

_ اه خلصنا منها تمام معلش يا عم حسن البرد هيموتني عايزه اخرج منها.

_ طيب هنخرج. قولتي اي في كلامي دي

_ موافقه طبعا . ومعاك باي حاجه يا عم حسن

_ تمام كدا . استني اراقب المكان وبعدين اطلعي.

_ طلع حسن بره اوضة التبريد وبيبص شمال ويمين. وبعد ما اتاكد مفيش حد جري بسرعه وطلع صفيه..

_ اسمعي يلا علي اوضتك دلوقت ونامي والصبح نفكر هنعمل اي .

صفيه بتترعش من برد الاوضه قالت هيا ومستعجله

_ ماشي يا عم حسن . امشي بقي تصبح على خير..

* طلعت صفيه تجري علي اوضتها ودخلت اوضتها وطلعت بسرعه علي السرير ولفت نفسها ببطانيه عشان جسمها يدفي وسندت ظهرها علي السرير وبتكلم نفسها.

_ هو اي الا بيحصلي دي انا كنت عايشه بفقر اه بس بالي مرتاح ومبسوطه اما هنا بالقصر فلوس وخير كتير بس كلوا بيطعن بكلوا وكل واحد عايز ياخد مكان التاني وكلهم متربصين ببعض وقلوبهم سوده . الواحد اهم حاجه نفسه ومستقبله معندوش مانع يقتل او يسرق في مقابل ان يبقي هو الكبير . وانا بينهم محتار وبيلعبوا بيا براحتهم وخايفه منهم ومش هينفع اكون سلبيه كدا انا لازم اتغيير وانسي صفيه الفقيره الطيبه واللعب معاهم لعبهم مش هسيب نفسي ابقي لقمه طريه لأي حد فيهم ومن اللحظه لازم ابقي صفيه تاني تحمي نفسها من شرورهم..

_ لحظات وسلمت صفيه نفسها للنوم العميق.

******

في الصبح حسن واقف قدام مكتب منصور بيه بالقصر مستني اذن الدخول.

دخل حسن للباشا بعد ما إذن ليه بالدخول.

منصور بصوت هادي

_ خير يا حسن في حاجه

_ الاستاذ نادر جاي من المصنع وبيقول عايز البيه في حاجه ضروري .

منصور هز راسه

_ خليه يدخل يا حسن.

طلع حسن من المكتب ودخل نادر وقف قدام منصور .

منصور بص ناحية نادر وهز راسه باشاره منه لنادر يقعد.

قعد نادر وبص لمنصور وقال بصوت هادي.

_ انا اسف يا منصور بيه جيت بدون إذن بس الموضوع اللي جاي فيه مهم جدا

منصور ولع سجارته ونفخ دخانها لفوق وبص ناحية نادر وبنبره مليانه كبرياء.

_ خير يا نادر واي الموضوع المهم اللي مش قادر يستني اروح المصنع دي !!

_ حضرتك طبعا عارف بالمناقصه اللي مقدمها مصنعنا ، بتاعت المكن الالماني.

_ خير مالها يا استاذ نادر المناقصه دي

_ للاسف يا فندم احنا عملنا كل حاجه عشان المناقصه تبقي بتاعتنا والبركه فيك معرف جنابك عملوا الواجب وذياده بس امبارح في شركه قدمت عطاء اكتر من مصنعنا ومش لاقيين حل معاهم و المناقصه فاضل عليها بكره وتظهر .

_ منصور عدل من قعدته وكشر وبص لنادر

ومين صاحب الشركه دي اللي عارف منصور الدالي داخل المناقصه ومصر ينافسني فيها !! اتكلم

_ شركة المعز يا فندم

منصور عينيه وسعت وتقلب بغضب شديد

_ انت بتقول اي يا نادر

_ زي ما بقول لحضرتك

_ ازاي ومين الحيوان دي اللي مقدم العطاء

_ قاسم الدمنهوري يا فندم معاه توكيل قديم بالتصرف من دلال هانم.

سكت لحظه منصور بيفكر

_ مش دي قاسم ال ..

_ ايوه هو يا فندم غاب ست شهور محدش يعرف عنه حاجه بعد الحادثه وفجاه ظهر

_ قاطعه منصور باستغراب

ازاي وكل الأخبار قالت عنه مات بالحادثه.

_ انا استغربت زي حضرتك ولما بعت رجالتي يعرفوا حكايته. طلع كان مصاب بكسور واتعالج منها والاخبار كانت مجرد اشاعه.

لازم تتصرف النهارده يا منصور بيه العطاء اخره بكره ويظهر رسي علي مين وبكدا ممكن يرسي عليهم. واحنا محتاجين المكن دي بالذات عشان نزود انتاج المصنع..

منصور وقف من علي مكتبه فجاه ووشه مليان غضب وقهر.

_ روح انت المصنع دلوقت وانا هتصرف واعتبر العطاء بالمصنع ..

خرج نادر من مكتب منصور . منصور واقف وشايط من الغضب وبداخله بركان يوشك علي الانفجار ..

اتنهد بقوه وقال ..

انا هخليكي تشوفي الذل اللوان يا دلال انتي والكلب دي.

خرج من مكتب وبيدفع اي حاجه قدامه بالقصر برجله طلع بسرعه علي السلم رايح ناحية اوضة دلال.

دفع الباب برجله بقوه كالعاده. دلال علي الكرسي المتحرك بتبص من شباك غرفتها علي حديقه القصر. اتفاجات بخضه من دخلته المعتاده وطريقته الوحشيه.

لفت جسمها بالكرسي. قرب منها منصور وحاطط ايديه في جيوبه وبيبص عليها في صمت بدل غضبه لهدوء

رفع حاجبه وبصلها وقال

_ اظن المره دي عارفه انا جاي ليه .

بصتله وقالت باستفزاز

_ ومن امتي بهتم لسبب وجودك هنا . مش فارقه اعرف والا لا

اضغط هنـــــــــــا للجزء 9